JO: Einsteigerhochtour Geltenhorn

JO Tour 'Gältähorn'

Mir si a däm tollä Samsti wägä gwittrigem Wätter ä Stung früächer gstartet. Wenn sogar Ämmtaler säge, dass mä izä schochli im Chrutt ussä isch, denn weiss mä, dass mäs isch. Nach ungefähr drüehaub Stung heimers a Louänäsee geschafft. Dä heimer aber rächts la ligä u si dür Matschpartiä und Bäch zur Gäutähütte ufgstigä. Mir heis meh oder weniger trochä zur Hüttä gschafft. Ir Hüttä hei mir üses Zimmer bezogä und öppis gässä.

Närä hättä mir eigentläch dussä Steiltechnik wöue aluege, ds isch aber dür erhöhti Luftfüächigkeit inä verschobä wordä. Aso hei mir närä im Zimmer seilverchürzige güebt und Lüt us Stägäspautä usäzogä. Nachdäm hei mir üs um d Tuuräplanig kümmeret hei, si mir zum Entschluss cho, dases nid so viel Sinn macht, die Tour dürä zufüehrä. Auternativä si ä angerä Gipfu oder Usbildig verusse gsi. Für letschteres hei mir üs entschidä. Zum Znacht hets Äuplermagaronii gäh. Mir hei no chli gspiut und sii när früch is Bett.

Am nächstä Morgä si mir am zähvor säschii uf (jedä wo früächer hät ä Wecker abglah, wär vor Anna höchstpersönläch duschet wordä). Nachem Zmorgä simer is Furggetäli ga ufämä Schneefäud umä hamplä und gah am nä nassä Seili umähangä. Zwätter het ender a Herbscht erinnert aus Summer…

Wider zrügg zur Hüttä het is dr Luca gfüärt wo äm Melwin üsserscht präzisi Swisigä dürä Kompass het gä. Dert hei mir de no öppis gässä und si nachär wider abgstigä zum Louenesee.

Dunger hets no kulturelli Grundbiudig vom Melwin überä Louänäsee gäh und mir si zum Entschluss cho, dass är unger d Kategorie Tümpu geit. Z Wätter isch immer besser wordä, wüus üs aber nummä viu het bracht si mir wider mit em Poschii zurügg is weniger abglägänä Ämmitau, oder ömu di meischtä. Trotz kem Gipfu e richig cooli Tour gsii.

von Simon Gfeller