Skitour 16.3.2024
Hüt am morge hei mir üs widr mau müed im Zügli troffe (s isch ou widr sehr früech gsi). Wie scho bi de letschte zwöi JO Skitoure si mer wider im Bus im kurvige Diemtigtal erwacht. Usem Poschi gstige simer bir Grimmialp. Aui komplett u nume öppis hett gfäut, dr Schnee. De simer zersch öppä 45 Minute ohni Ski a dä Füess am Schnee entgägä gloffe. Mit em nä Slalom us Ski uf Ski ab hei mir de di erste Höhemeter bewältigt. O nachde erschte Höhemeter hetts no meh Waudbode aus Schnee gha. Und hüt heimer aui gmerkt, Schnee isch nid gleich Schnee. Es git Waudbode Schnee, gäube Schnee, fasch gschmuuznige Schnee, nasse Schnee oder äbä: gar keine. Jedoch hei mer de doch no chli me Schnee gfunge und denn chöne afähle. Gmüetlech simr näre losgwatschlet richtig Rauflihorn. Nachemne gäbige Ufstig hei mir de o scho der Gipfu erreicht. Dert hi mir ä grossi Muur böuä, wo üs vor em Wind het gschützt. Perfekt vorem Wind gschützt hei mir när üse Lunch gässe und druf gwartet das mir chli usem Näbu chömä um ä schöni Abfahrt z gniessä. Nachdem mir üs no im Gipfubuech verewiget hei, isch de ds Schönwätterfenster scho da gsi und mir hei chönne losfahre. Bim Abefahre si d Schneebedingige sehr underschidlich gsi. Wöu mir viu z früeh si gsi hei mer no glehrt Schneehöline boue. Bim Schufle hei ömu aui wider warm übercho und churz heimr überleit, ob mir äch glich wei biwakiere. Abr wüus ohni Schlafsack de glich chli früsch wär worde, heimr de no die räschtlichi Abfahrt i agriff gno.
Da mir dr gliich Wääg abegfahre si wimer ufe si, sis o chli di gliiche Sache gsi wonis beschäftigt hei. (Siehe Sätze 1-9 und steuders eifach rückwärts vor, de müessemer weniger schribe) :)
