Touräpricht vor Ihstigerskitour am 20. Januar 2024
Standartprogramm: am 10 vor 8i hi mir üs z Langnou am Bahnhof troffä. Melwin, Jönu u Sophie hi sich scho z Bärn mit em Zug ahgfründed u d Egoischtä si mit em Outo uf Sörebärg unger a d'Rothornbahn gfahrä. Nachärä churzwiligä Zugfahrt hi o mir d'Taustation erreicht. Bim Fääli montierä hets glub aui ad Finger gfrohrä. So hi mir nid lang umä zaaget u si e cheer afa lufä. Ds Panoramasträssli het e gueti Aafangsstrecki bote. Dür nä Aafangssprinnt hi mir aui warm gha u z erschtä Abziehpöiseli müesse ihlege. Churz nachdäm hets ä Crash-Kurs 'Spitzcheeri' gäh. Mir hi üs aui uf dä glichä paar Quadratmeter zämäpfümlet. Dr verfüegbar Platz mit ärä Hangneigig über 30° isch haut rar. Nachämnä witärä Haubstundä-marsch är Strass entlang u no chli näbä ussä, hi mir üses Zmittag ufämnä schneebedecktä Misthuufä gnossä. Melwin het sis Zuckerloch wider uf 0 brungä.
Guet gstercht u vouär Elan hi mir dr letscht Bitz unger d'Schii gno. Zwüschdrinnä hets no ä Crash-Kurs 'LVS' gä. Bim letschtä Ufstig zum Gipfu hi mir dr Crash-Kurs 'Spitzcheeri' grad chönnä ahwändä. Bim Blick uf di verschneiti Bärgwäut umnä Gipfuföteli mit staublauem Himmu hi aui fescht gstrahlet.
Dr Powder ungerdä Schii isch supi gsi, Grebli himer aui überwundä, Verletzti hets o keni gäh u z Materiau het o nid glittä. So het üsi Schiitour äs schööns Ändi gno.
Leiter: Anna, Sophie, Jonas
Teilnähmer: Dario, Hannah, Renato, Melwin, Lukas, Luca, Noah, Jonas, Melanie, Salome, Colin
