JO_Langnau-Header.jpg

JO LANGNAU

Skihochtour Rimpfischhorn

22.04.2017 - 23.04.2017 .............
Leitung: Anina, Jonas
Teilnehmer: Rebekka, Michu, Mänu

 

22.04.2017

Mitm ÖV isch am Samstig e Gruppe mit junge Ämmitauer Richtig Saas-Fee greist. Z Visp si viu angeri Gruppe umegstange, wo äbefaus iz Saasertau hingere hei wöue. Mir hei üs uf au Fäu e Platz im erschte Poschi chönne erkämpfe. Vo Saas-Fee isches de mit U-Bahn u Seilbahn bis ufs Mittuallalin gange. Die Höhemeter si no rächt locker gange. Womer schwär schnufend üsi Fähli, Gstäutli u warme Chleider montiert hei, simr uf d Outobahn richtig Allalinhorn igspuret. Bi bestem Wätter u mässigem Wind heimer am Skidepot d Stigise agleit, hei zwöi Seilschafte gmacht u si no di letschte paar Höhemeter ufe erscht 4’000er vom Mänu gstige. D Ussicht isch grandios gsi. Viu z schnäu simer scho ume dunger gsi u hei churz vor dr Britanniahütte e usgibegi Mittagspouse gmacht. Damit niemer cha säge, mir heige ja gar nüt gmacht, simer hinger dr Hütte no ga Firnverankerige u Fläschezüg üebe, bis d Sunne hinger de Feuse verschwunde isch. Zfriede u mit Sunnestrahle voutanket heimer üs d Pasta ir hütte la schmöcke u heinis i Schlag Nummer 9 begäh.

Sunntig 23.04.2017

Bääm. Mit äm ne heftige Liechtflash wo vo üsne Zimmergenosse isch usglöst worde si mir i Tag gstartet. Am haubi 6i hets ner Zmorge ghä, mit Müesli, Joghurt, Miuch und Brot hei mir üs gstercht für üsi Tour ufs Rimpfischhorn. Wegem Stou uf dr Herretoilette het sich üsi Startzyt um ca. ä Viertustung verschobe u mir si ersch am haubi 7ni richtig gstartet. Zum Glück hets aus ersts scho grad e chlini Abfahrt vo 100 Höhemeter ufe Gletscher abe ghä. Ufem Gletscher unger hei mir näb de angere Gruppene üsi Fälli montiert. Wiu Mänu dr Bügu vom Fälli het gfäut hets i sim Fau o ä Kabubinder ta. Gmüetlich si mir losglüffe u hei üsi Strecki ufem Gletscher hinger üs gla. Zwüsche düre hei mir chli pöiselet u öppis trunke und gässe oder äm Mänu sis Fälli mit Tape a d'Skis gchläbt. Witerglüffe si mir bis mir hei müesse d Harschise montiere. So si mir när no di letschte paar hundert Höhemeter ueche gspuelet. Drzwüsche ischs vom bissige Wind no eis chli früsch worde. Zum Glück si mir när am Feus im Windschatte gstange. Dert hei mir ner d Fälli und Harschise abgno und d Stigise a d'Schue klickt. Ufem Wäg zum Gipfu si mir zersch z Couloir ueche gstampfet u ner übere Lavafeus gchletteret. Ungerwägs hei mir no es paar angeri Seilschafte gchrüzt bis mir obe si acho. Bi däm Wätter isch d Ussicht dr Hammer gsi! Nach derä churze Gipfupouse si mir ume dr glich wäg zrugg bis zu de Skis. Dert hei mir när d Skis ufe Rucksack packt u si no chli witer dür d Feuse abgstige bis mor ume hei chönne fahre. Unger si mir när mitem ne Sässelilift ume chli id höchi für dass mir när bis uf Zermatt ache hei chönne fahre. Mir hei när müesse feststeue, dass d Taufahrt gsperrt isch gsi. Mir heis när glich riskiert d Skis müesse z trage u si so wit dass es isch müglich gsi dür pflotsch und Glunggene ache gfahre. Wär häts dänkt bis uf ei chlini Passage hei mir aus chönne fahre! Unger si mir när zimmli schneu ufe Zug gha Plätz reserviere u hei dert mit em nä Thaiwaner ahgstosse und üses Bier gnosse. So het di Tour und di ganzi Wintersaison vor JO es zfridnigs Endi gno.

Tourebricht: Michu & Mänu

 

 

Copyright © 2017 SAC Emmental

Web-Umsetzung Day Design.