JO_Langnau-Header.jpg

JO LANGNAU

Skitourenwoche

03.04.1017 - 08.04.2017 .............
Leitung: Silvan Gerber, Bruno Renggli
Teilnehmer: Anne-Sophie, Aila, Michel, Fabian, Manuel

Tourenbericht JO-Skitourenwoche 2017

 

Montag:

Am Mändig Morge himernis im Zug richtig Chur troffe. Womer du z'Chur si acho himer de o Brünu ungernis gha. När simer mitem Postauto mit 12 Ränk u no ganz Hüfä Kurfi nach Bivio gfahrä. Dert himer de afang üses unnötige Zügs im Hotel Post abgliht. När himernis mitem Bügulift afang äs paar Höhemeter mite Fäu gspart. Womer z'oberst si gsih himer de afang ä chlineri Abfahrt gha. I dere hi du afang äs paar gmerkt dases filech no praktisch wär gsih d'Ski z'wachse. När simer de no ufe Piz dal Sasc glofe u hi di ersti Abfahrt mit brämsigem Schnee chönnä gniesse. Womer du dunger si gsih himernis i üsem Top Hotel chönne iquartiere u hi när äs super feins Znacht gha. När simer du no z'letschdmau früsch dusched ga lige.

Manuael Ramseier

Dienstag:

"Es isch Winter" het üse Jo Chef am Dsischti morge voller Freud grüeft u ä Handvoll Pulver id Luft gschosse. I dem schöne Pülverli simer de ner vom Julierpass us losglofe richtig Jenatsch Hütte. Dr Michi natürlech immer i sire eigete Spur. O wemer mängisch nid so viel gseh hei, oder haut nume wiss, heimer ufem Weg none Gipfu gfunge. Mit Stigise a de Füess u de Ski ufem Rücke simer auso no ufe Piz Surgonda u vo dert us när abegfahre, fasch bis zur Hütte. Womer de hei uspackt gha u üses deheime für di Wuche chli erkundet hei, hets de afang mal es Bier gä und e rundi Schnöizle.

Anne-Sophie Willen

Mittwoch:

Am Mittwuch si mir am haubi 7i mau ufgstange u hei zmörgelet. Wiu niemer gnau het gwüsst wenn das mir wei starte, hei mirs chönne gmüetlich näh. Fälli montiert und LVS ahgla, si mir losglüfe. Z Zieu isch dr Piz Calderas gsi. Ungerwägs hei mir geng ume chli öppis gässe und trunke. Z Wätter isch bewöukt gsi, es het gluftet u d Sunne het nume zwüsch düre füre gluegt. Wos när chli steiler isch worde hei mir d Harschise ad Ski montiert u si witer glüfe. Plötzlich hets ufgrisse u hinger de Wouke isch d Sunne füre cho u unger üsne Skis het dr Powder glitzeret wi es Meer vou Diamante. Mir si witer glüffe bis es de z steinig isch worde u mir uf d Stigise hei umgsattlet. Obe ufem Gipfu hei mir när chli öppis gässe und trunke bevor mir ume zu de Skis si abgstige. Bi de Skis hei mir üs parat gmacht für ä cooli Abfahrt. Ir Äbeni unger ahcho hei mir ume d Fälli ahkläbt u si ufgstige richtig Piz Picuogel. Spitzcheri für Spitzcheri si mir geng wi höcher gstige. Ir Lücke obe hei es Paar angeri Touregänger gwartet bis mir der Hang hei freighä und sie ihri Kürveli hei chönne zieh. Mir hei es witersmau d Stigise ad Schue tängelet u si zersch übere Grat ufe Piz Picuogl u ume retour. Bi de Ruckseck hei mir ume öppis trunke u si ner no übere Grat vom Piz Tschima da Flix ueche gsecklet. Ufem Gipfu hei es Paari no es Nasebisquit gno bevor mir ume si ache gsecklet und üs ganz schneu hei parat gmacht für d Abfahrt düre Powder. D Fahrt düre Powder het aui monstergeil dünkt. Ir Hütte hets ner no es Paar rundine Schnouz und Bier ghä u schliesslich no Znacht bevor mir ufe Piz Matraz si gha schlafe.

Michu Kipf

Donnerstag:

Am Donnstig isch di wahrschindlich geilsti Tour vor Wuche ahgstange. Mir si wie scho a de letschte Morgete am haubi 7i gha zmörgele. Ca. 1h nachem Zmorge si mir ner losglüfe. Wius no bewöukt isch gsi si mir vorem eigentliche Zieu no ufe Piz Agnel. Mir si schneu dobe gsi u o ume schneu dunger. Mit de Skis si mir ume id Äbeni ache gfahre u hei uf d Fälli gwechslet. Ner hei mir üs richtig Piz Traunter Ovas begäh. Zersch si mir ume dür d Äbeni glüfe u ner langsam id Höchi. Nach em ne Wyli si mir ner vorem stozigste Stück Weg gstange u hei müesse d Harschise a d Skis houe. Dr Brünu het ume e super Spur ahgleit u für d Spitzcherinä immer es gäbigs Bödeli picklet. Es isch e sehr abwechsligsriche Ufstig gsi. Dobe si mir ner no hurti di letschte 15 Meter ohni Skis ufe Gipfu übere glüfe u hei d Ussicht gnosse wo mittler wyle wunderschön isch gsi da sich d Wolke hei verzoge. Ner ischs ad Abfahrt gange! Es hei sich aui meeeega druf gfreut u mir si fasch vergizlet vor Fröid. Zersch hei mir dr Hang quert u si bis zum Couloir gfahre. Ahschliessend isch jede einzu ache gschnüzt u het siner Bögli zoge. Unger am breite Hang hei mir no einisch gstoppt u hei üsi Kurve i de Hang ihgraviert. Unger geng no im Powderhigh hei mir üs no eis verpflegt u si ner ume zrugg zur Hütte ufgstige.

Michu Kipf

Freitag:

Am Friti simer gmütlech nachem Zmorgä zum Piz d'Err ufbrochä. Es isch nid so lang gangä bis mir aui e Jaggä meh hei müssä führä nä weus so gstürmt het. Uf em Weg hets ou no e schwirigi Passage gha womer Ski hei müsse träge. Ungä am Piz d'Err heimer Stigisä agleit u si losglofä. Ufem Weg hei es paar recht kalti Finger becho weus so chaut isch gsi aber mit Häntsche tuschä isch de aunä wieder gut gangä. Bim letzä Biz heimer üs no abundä und müssä kletterä. Womer de ufem Gipfu si acho het sogar d Sunnä no chli möge dürä drückä u bir Abfahrt het si de ganz gschinä. Nachemnä Handystopp i der Sunnä simer zrügg id Hüttä gfahrä und hei dert üses Bier gnossä.

Aila Steinmann

Samstag:

Hüt isch scho der letschti Tag vo dere tolle Wuche gsi. Am Morge si mer früecher ufgstange damit es ou sicher ufe Bus längt. Angersch aus ou scho, isches vo Afang ah schön Wätter gsi. Dr ersti Ufstig isch rächt gmüetlech gsi. D' Abfahrt isch ziemlech iisig gsi und witer unge när fasch wine früsch gmachti Piste . Damit mer ou a däm Tag no ei Gipfu gmacht hei, het üs dr Bruno no ufe Piz Campagnung gfüert. Bim ufeloufe isches de ou rächt warm worde. Obe hei mer es gäbigs Pöiseli gmacht, wiu mer eh no viu Zyt gha hei. Vo dert hei mer d' Stross vom Julierpass gseh und au die Lüt wo am ufeloufe si gsi. Zitat Anne-Sophie: "do unge isch d' Realität". När hei mer no e tiptopi Abfahrt imene gäbige Sülzli gha und hei am Schluss no z La Veduta öpis trunke. Do het dr Bruno no gmeint das är sys wichtigste Ziu erreicht het und niemertem öpis passiert isch.

Fabian Rosser

Copyright © 2017 SAC Emmental

Web-Umsetzung Day Design.