JO_Langnau-Header.jpg

JO LANGNAU

Skitour Bunderspitz

19.02.2017 - 19.02.2017 .............
Leitung: Dino, Dävu und Karin
Teilnehmer: Michu und Anne-Sophie

Am Morge früe het sich um e chlini Tschuppele vor Jo-Langnou mit dr erste Verbindig ufe Weg gmacht richtig Adubode. Im Zug hei aui wo d Fälli no nid ah d Skis montiert hei das no nacheghout, dass mir de ömu grad usem Bös hei chönne gummpe u sofort starte! Haut öppis isch no nid ir ornig! Dr Gruppetest däich! Dävu het denä wos no nid isch klar gsi hurti dr Ungerschid zwüschem chline und grosse Gruppetest erklärt (hie het mä gseh wär bir ahfängerskitour het ufpasst). Auso hei mir grad hurti dr gross Gruppetest düregfüehrt. Und scho si mir losmarschiert. Meter für Meter si mir geng wi höcher gstige, oh we d Spur das mau vom ne Joler gleit isch worde wo ersch sini 3ti Tour het gha. Nach rund 650 Höhemeter hets di ersti längeri Pouse ghä. Aui hei öppis gässe u trunke u z herrlichä Wätter gnosse. Nach dr Pouse ufem Bänkli si mir ufem flachere Gländ chli schneuer fürschi cho. Scho gli isch di nächsti Stigig cho u Dävu het z Spure überno. O die hei mir wi im Flug hinger üs gla. Dino het sini Drohne für di letschti Strecki parat gmacht u het sä i d höchi la stige. Doch würklich uf ihn glost het si nid! Dr um heter sä o grad ume la lande u sä verrumt (er Versuchs de speter no einisch ). No 300 Höhemeter bis zum Gipfu! Ufem letschte Stück hets no es paar Spiztcherinä ghä. Teilnäh isch das chli ringer gange aus dä Angere. 50m vorem Gipfu hei mir d Skis abzoge u d Fälli demontiert was nid ganz eifach isch wesentlich so stark luftet(o hie het sich d Ufmerksamkeit bir Ahfänferskitour bemerkbar gmacht). Dino u Michu hei d Skis aus einzigi ufe Gipfu treit. Obe ahcho hei mir es mega cools Panorama chönne gniesse. Abr wius geng no het gluftet unds bi so viu Lüt langsam äng isch worde si mir witer ache gfahre oder äbe glüffe. Dert hei mir när Zmittag gässe und Dino sini Drohne flugparat gmacht und es paar Föteli gmacht. Somit isch d Jo-Langnou äuä fasch di modernsti Jo vor Schwiz! Iz wo di Drohne ir Luft isch gsi, hei mir üsi Skis a d Füess gchlepft u si süferli losgfahre. Dino het aber d Drohne nid chönne überrede mit üs z cho, wo ner no si Handyakku isch leer gsi u si kes Signau me het gha, het si gar nümm uf ihn glost! Si isch ner ah 100m entfernt Startplatz zrugg gfloge u het uf Dino gwartet. Wo sä Dino ner ume het verrumt gha, si mir när zügig iz Tau ache gfahre u hei üsi Bögli gmacht (o hie het sich wieder ä Niveauungerschid zeigt). Trotzdem heis aui ussert Dävu gschafft ungerwägs mindestens einisch i Schnee z lige. Nachdem aui ihri Sache ihgrumt hei gha het sich scho z nächste Drama ergäh: haub verdurstet wäre mir aui gern hurti ine Beiz gha hocke u öppis zäme gha trinke, nid nume wiu mir aui glust hei gha, sondern o wiu fasch niemer me öppis drinkbars im Rucksack het gha. Leider isch di einzigi Beiz ir nechi zue gsi u so hei mir haut durstig abr zfride uf z Poschi gwartet. Z Frutige ahcho si mir sofort zu Kiosk für üs mit flüssige Erfrüschige ihzdecke, u si ner mitem Zügli um zrugg iz Ämmitau gfahre.

Bricht: Michu



Copyright © 2017 SAC Emmental

Web-Umsetzung Day Design.