JO_Langnau-Header.jpg

JO LANGNAU

Skitour Hefti

04.03.2017 - 05.03.2017 .............
Leitung: Resu u Housi
Teilnehmer: Yuri, Anne-Sophie, Silas, Fäbu, Michu

Samsti Morgä, 7.05 Uhr. Z'Langnou träffe mer üs im Zug u düse richtig Sörebärg. Vo überau isch üsi Gruppe zämecho, Langethau, Bärn, Bowiu, Langnou ...d'sächste höch starte mer üses Heftihütte Abentür i denä früeche Morgestunde. Z'Hirsegg stige mer usem poschi u verteile dr Balascht. Üsi Tour faht leider mitemne schmärzende z'morgeverlust ah; z'Ovo Crunchy het d'Areis leider nid überläbt :( schüsch simer aui motiviert u zwäg u starte nachem afälle üsi Tour. D'iräktroute het leider unger ab z'weni Schnee, drum gömer übere Rügge richtig Hängst u quere när richtig Hefti Hütte. Am 11.30 Uhr chömemer bi Sunnäschin ir Hütte a. Z'ersch wird z'Wc u dr Hütteigang freigschuflet. Resu, Housi u Michu gönne sech no es abfährtli. I derä zit mache Fäbu, Anne-Sophie u der Yuri ä Schneebar :)
Nachere churze Ufwermig ir Hütte näme mer dr Bou vo üsem komplett Durchdachtä Iglu i agriff. Bouführer Housi seit was Sach isch. Nach guet 2 Stung heimer auso es Prachtsexemplar härezouberet :) Nach dr Fertigstellig vom iglu hei sich di meiste ir hütte ume chli ufgwermt. Fäbu und Anne-Sophie hei sich no um d Inneihrichtig kümmeret u no es paar auti Brettli aus Sitzungerlag ihboue. Dinne si Aui sho ume veiechli warm gsi. Wo ner aui dinne si gsi hei Resu, Yuri und Michu e sehr ernsthafti Rundi Helikopterquartett gspiut! Dr Michu het dank em Mil Mi-26 di Rundi gwunne. Ds Lastwagequartett het natürlich o nid dörfe vergesse gha...drum hei si das ono düregspiut. Fäbu, Anne-Sophie, Housi und Silas hei i dere Zyt e Rundi odr zwo gjasset. Langsam ischs hinger z Znacht gange... jede het öppis i Schnee usetreitt u wo z Fondue nache isch gsi hei Aui im Iglu scho freudig druf gwartet. So hei mir auso üses Fondue im Iglu bi Cherzeliecht dörfe gniesse. Nachdem o z zwöite caquelon isch leer gsi si mir no chli im Iglu blibe hocke u hei chli gschichtli verzeut über z'Totemügerli, dr Schöppelimunggi und dr Houderebäseler. Nach dene Gschichtli si mir du doch langsam ume ad wermi iche. Dinne hei mir no ds Dessert üsi Schoggicreme ahgrüert. Bir Nidle si sich Michu u Resu nid einig gsi wenn di richtigi Konsistänz erreicht isch. Nachem Dessert hets scho gli einisch Firabe ghä u mir si gha Schlafe.

Sunntig

Am Morge si di erst ca. am 7i uf de Bei gsi u hei dr Ofe igheizt. Es si no es paar Minute vergange bis de Aui ufgstange si.
Es isch e wunderbare we nid perfekte Sunntigmorge gsi. Langsam isch z Z'morge ufe Tisch gwanderet u d Jo het sich drum versammlet und ahfa ässe. Nachem Z'morge hei mir üs ahgleit und hei no eis e chlini abfahrt richtig Heftibode gmacht. Dr Silas het ner d Spur für ume ueche zoge. Veiechli Zügig hei Silas u Michu d Gruppe gsprängt. Dobe het d Anne-Sophie, wo ir zwüsche Zyt het d Chuchi gmacht uf üs gwartet. Zäme hei mir d'Hütte ume uf vordermann bracht u sä schliesslich ume alleini gla. Mir hei üs ufe Weg gmacht richtig Hängst. Ungerwägs hei mir d Fälli einisch drab u wieder druf ta. Ufem ganze Wäg si mir sicher fasch nie eispurig ungerwägs gsi. Scho zimmli gli si mir ufem Hängst gstange u hei üs gratuliert. Mir hei hurti öppis chlises trunke u es paar Nussstängeli gässe u si när scho ume talwärts gfahre. Es isch e schöni Abfahrt gsi u het aunä gfaue. Dunger hei mir üses Züg ihpakt und ume chli öppis gässe. Nach äre Haubstung isch scho z Poschi cho u mir si ume richtig Langnou gfahre. Vor Langnou hei mir üs vonang verabschidet u si teilwis usgstige.

Tourebricht: Yuri und Michu

Copyright © 2017 SAC Emmental

Web-Umsetzung Day Design.