JO_Langnau-Header.jpg

JO LANGNAU

Ischchlättere Saxten

21.01.2017 - 21.01.2017 .............
Leitung: Dävu
Teilnehmer: Anne-Sophie, Kita, Rebeka, Fäbu Rosser, Peter Glauser, Michu

Am Samstig morge sehr sehr früech si sich es paar vor Jo-Langnou übere Weg glüfe u hei churzfristig beschlosse dass es ds perfekte Wätter wär für chli z chlättere am gfrornige iisch wo z Saxeten i grosse Mängine usem Feus isch cho. Gesagt getan, si mir nach X-mau umstige im ne zämequetschte postouto mit integriertem miuchtransportahhänger uf saxeten ueche gfahre. Obe ahcho het üse Bergfüehrer dr Marcel scho uf üs gwartet. Aus nächsts ischs hinger d Materiauschlacht gange... hie no 2 Tool, da no es paar Stigise, etc. Churz druf abe si mir scho los glüfe richtig Iischfäu. Nachem Bitz uf dr Strass ischs düre Töifschnee mit de schöne Kristaue obe druffe. Zum glück isch scho gspuret gsi. Bi de Iischfäu hei mir sofort d Stigise montiert u Gstäutli ahgleit odr besser umgekehrt. Aus ersti Üebig hei mir mit de Tool chli im ungere Bereich boulderet. Für teu ischs ni ganz eifach gsi mitem Tool zwöi mau di glichi Steu z träffe. Nachem ahschliessende ahluege vo dr Standartbewegig het dr Marcel u dr David 3 Tops ihghänkt. Sofort si di erste 3 los gchlätteret. Es het aune e riiise Freud gmacht uf dem Iisch desume z Nüdere. Ab und zue isch scho öppis obe cho abr es het am ändi vo däm Tag chli no gnue Iisch ufem Feus gha für dass sich ono angeri chöi verwürkliche. Zwüschdüre isch hie u da ume öpper chli am üebe Schrube ihträie gsi. Am Nammitag hei es Paari no are 4te Steu z Top ihgrichtet. So hei es Paari ono chli z gfüu vom Vorstig chönne erlebe. Nach däm o dert no chli gchlätteret isch worde ischs sch gli um z Zämerume gange. Zum Glück si d Iischschrube aui Markiert gsi so dasses dert kes grosses Gnusch het ghä. Bim abeloufe hei mir no müesse ufpasse dass me ni vom ne Schlitte überfahre isch worde. Vo de Schlittler het kenne wöue Taxidienste ahbiete wiu si grad z miz im ne Renne si gsi. So hei mir dr Versuechig müesse widerstah eine vo dene Fahrer z kidnappe. Mir si zum Glück o ohni es Fahrzüg i di nächsti Peiz cho u hei dert no dr Tag mit em ne Glüewy, Hexekaffi odr ere Ovo la usklinge.

 

Copyright © 2017 SAC Emmental

Web-Umsetzung Day Design.