JO_Langnau-Header.jpg

JO LANGNAU

JO-Höck

19.11.2016 - 20.11.2016 .............
Leitung: Silvan Gerber
Teilnehmer: Nadine Kipf, Christa Maag, Aila Steinmann, Anne-Sophie Willen, Rebekka Walther, Florian Marbot, Oliver Keller, Michel Kipf, Benjamin Adam, Sebastian Kitagawa, Jonas Walther, David Thommen

JO-Höck im Wagliseiboden

Am Samsti Nami hei mir üs aui ir Climbox troffe u hei kontrolliert ob dr JO-Chef de ou vo auem gnue het ikouft. Vo öpisem hets natürlech widr zweni gha u de hetme das no schnäu müesse ga choufe. Aus nächste Haut isch d’Kambly im Truebschache veriibart worde. Ungerwägs het no öper bi sich deheime müesse ga luege ob d‘Herdplatte abgsteut isch oder nid. Grund für die zum Glück unnötige Sorge isch äuä ä Füürwehrüebig, wo säubtags dert het stattgfunge, gsi. Ir Kambly heisech de afa aui zerschtmau d’Büüch gfüut (so hets när weniger Fondue brucht…). Da dr Ort vom JO-Höck traditionell nid bekannt gä wird, isch langsam dr Vrdacht ufcho, dasses id Hefti chönnt ga. Das isch aber irgendwie ou nid müglech gsi, da mir ä Liinwand u ä Beamer zum Fotos luege hei drbi gha u mir sicher wäre iignachtet bis mir ir Hefti obe wäre gsi. Glandet simer de schlussändlech im Wagliseibode, ir Nechi vom Salwideli. Ds Huus womer hei ad Wermi chönne, ghört am Skiclub Eschlismatt u isch für sone Abe super iigrichtet. Nachem Apéro um aschliessende Fondue heimer d’Fotos vode disjährige Toure agluegt u hei gueti (u z.T. weniger gueti) Erinnerige la ufcho. Nacheme gmüetleche Zämesi, vieu Lache, Diskutiere u Plagiere ischme de nadisna id Bett gange. Am Sunnti heimer nacheme usgibige Zmorge no paar Schritt id Silwänge ufe gmacht. Die wo hei wöue (oder wos provoziert hei) heisech no chli im erschte Schnee vo däm Winter gwäuzt u sich la wäsche. Vou motiviert für die erschti Skitour vom nächste JO-Programm heimer ds JO-Jahr 2016 la usklinge. Unvergässlechi, sehr strängi u dür das im Hingerdri ou schöni Momänte hei das JO-Jahr prägt. Aber ou gmüetlechi u gseuegi Aläss wi dä vo däm Wucheänd, wärde üs i Erinnerig blibe! Uf das mir ou im nächste Jahr chöi ide Muusehüfe ga Barryvox sueche, di länge Ungerhose ga zrüggerobere, mit Clowns ds Bärg ga, u erfahre wis tönt, wesech äs Sifon läärt…!

Silvan Gerber

Copyright © 2017 SAC Emmental

Web-Umsetzung Day Design.